AQShning Minnesota shtati politsiyasi YouTube’dagi kanali uchun videoni suratga olish vaqtida sevgan yigitini otib qo‘ygan 20 yoshli Monaliz Peresni qo‘lga oldi. Bu haqda Daily News’ga tayanib, Daily Afisha xabar berdi.
Pedro Ruis III homilador dugonasiga kanaldagi kuzatuvchilarini jalb qilish maqsadida videotryuk suratga olishni taklif qilgan. “Tasavvur qil, bizning 300 ming kuzatuvchimiz bo‘ladi”, — deydi Ruis videoda. Buning uchun u Peresga 50-kalibrli jangovar qurolni berib, undan kitob orqali o‘ziga qarata o‘q otishini so‘raydi. O‘q kitobni teshib o‘ta olmasligiga uni ishontiradi.
Qizning tergovchilarga so‘zlashicha, u Ruisni bu kabi tavakkal fikrdan qaytarmoqchi bo‘lgan, biroq u o‘z bilganidan qolmagan. Oqibatda kitobni teshib o‘tgan o‘q, juftlikning uch yashar qizining ko‘z oldida yigit ko‘kragiga qadalgan. Tez yordam xodimlari 22 yoshli amerikalikning hayotini saqlab qola olmadi, uning joni voqea joyidayoq uzilgan.
Noxush hodisa sodir bo‘lgan Krukston shahrining sudi Peresning yetti oylik homilasi borligini hisobga olib, unga “qasddan qilinmagan qotillik” bandining ikkinchi darajasi bilan ayblov qo‘ydi. Bunda qizga maksimal — 10 yil ozodlikdan mahrum qilinish yoki 20 ming dollar miqdorida jarima to‘lash jazosi qo‘llanilishi mumkin.
Izoh (0)