Avstraliyada terrorchilardan himoya uchun qo‘yilgan beton to‘siqlar turli ranglarga burkandi

Avstraliyaning Melburn shahri jamoat joylari va vokzali yaqinida 28-iyun kuni piyodalarni transportdagi terrorchilardan himoya qilishga qaratilgan to‘rtburchak beton to‘siqlar o‘rnatildi. Bu haqda TJournal xabar bermoqda. 

Ertasiga mahalliy rassom Devid Grey bir necha kublarni turli rangdagi matolar bilan o‘rab qo‘ydi. U boshqa rassomlarni ham undan o‘rnak olishga chaqirdi. 

“Melburnni misli ko‘rilmagan san’at sahnasiga aylantirish mumkin. Vaqtincha bezatish lozim bo‘lgan kamida 5 ta joy bor”, — ta’kidladi Grey. 

Shahar rasmiylari shu yil boshida avtomobil markazdagi ko‘chalardan birida olomonga kelib urilganidan so‘ng shunday to‘siqlar o‘rnatishga qaror qilgandi. O‘tgan yil oxirida Yevropaning yirik shaharlarida terrorchilik hujumlaridan himoya uchun shunday to‘siqlar paydo bo‘lgandi.

Biroq tadqiqotchilar tomonidan o‘tkazilgan krash-sinovlar hatto eng mustahkam to‘siqlar ham harakatlanayotgan avtomobilni to‘xtatib qololmasligini ko‘rsatdi.