Буюк Британиянинг Морей графлигидан бўлган собиқ ўрмончи ва ёғоч кесиш заводининг эгаси 75 ёшли Ричард Огилви Иккинчи жаҳон уруши давридан қолган кемани сувга тушираман деб, омадсизликка учради. Беш йил давомида таъмирланган яхта, беш дақиқада чўкиб кетди. Бу ҳақда Metro’га таяниб, TJournal хабар берди.
Огилви эски Sea Wraithe кемасини 2007 йилда Шимолий денгизга йўл олиш орзусида сотиб олган, бироқ уни таъмирлашга бир неча йилдан кейин киришган. 12 метрли яхтани таъмирлашга у кунига саккиз соат вақтини сарфлаган.
Огилви яхта тайёр эканлигини синаш мақсадида кемани Шимолий денгизнинг бўғозларидан бирига туширган. Бироқ уни омадсизлик кутмоқда эди: беш дақиқадан сўнг кема сув остига чўкиб кетди.
Ушбу ҳодисадан сўнг Огилвининг икки нафар ўғли кемани қуруқликка олиб чиқишда ёрдам берди. Ҳозирда кема соҳилга боғлаб қўйилган. Яхта эгаси машинада ухлаб, сув чекинишини кутмоқда. Шундагина у кема бортидаги сувни чиқариб ташлайди.
Огилви яхтанинг реставрацияси учун бор кучи ва маблағини сарфлаганини тан олди. Бундан ташқари у ушбу кема учун қанча пул сарфлаганини хотини билиб қолишидан қўрқмоқда.
Омадсизликка қарамай, Огилви бу воқеани «яхши тажриба» дея атади. Бироқ унинг рафиқаси Сью эрининг ишини «бутун оилани шарманда қилиш», дея баҳоламоқда.
Изоҳ (0)