Davlat departamenti: AQSh ma’muriyati Suriya rasmiylari kimyoviy qurol qo‘llashga tayyorgarlik ko‘rayotgani dalillarini keltirmaydi

AQSh ma’muriyati Suriya rasmiylari kimyoviy qurol qo‘llashga tayyorgarlik ko‘rayotgani dalillarini keltirmaydi. Bu haqda Davlat departamenti rasmiy vakili Xizer Nauert ma’lum qildi, deya xabar beradi “Gazeta.ru”.

“Dalillar oshkor etilmaydi, chunki bu razvedkaning vakolatiga kiradi. Ba’zida biz tafsilotlarini keltira olmaydigan masalalar paydo bo‘ladi. Biroq ular Qo‘shma Shtatlarning oliy darajadagi hukumati e’tiborini tortadi”, — dedi Nauert.

Davlat departamenti vakiliga ko‘ra, AQSh rasmiylari Suriyaning kimyoviy hujum o‘tkazishga tayyorgarligi yo‘qligi haqidagi bayonotlariga ishonmaydi.

“Asad tuzumi o‘z xalqiga nisbatan kimyoviy qurol qo‘llaganidan xabarimiz bor va bu bizda jiddiy xavotir uyg‘otadi”, — xulosa qildi Xizer Nauert.