O‘zbekiston Respublikasi Bosh prokuraturasi 1-iyundan beri fuqarolarga kommunal xizmatlar uchun noqonuniy qarzdorlik hisoblash bilan bog‘liq 13 ta holatni aniqladi. Bu haqda Xalqaro press-klubning 28-iyun, chorshanba kuni bo‘lib o‘tgan yig‘ilishida Bosh prokuratura vakili ma’lum qildi, deya xabar beradi “Kommersant.uz”.
Ma’lumki, Bosh prokuratura huzurida energiya resurslari uchun to‘lovlarning o‘z vaqtida va to‘liq undirilishiga, elektr va gaz taqsimlash tarmoqlariga noqonuniy ulanish hamda talon-taroj qilish holatlarini aniqlash, bartaraf etish va oldini olishga, shuningdek, sud hujjatlarining so‘zsiz ijrosini ta’minlashga mas’ul bo‘lgan Majburiy ijro byurosi tashkil etildi.
Bosh prokuratura vakiliga ko‘ra, qarzdorlik summasi bo‘yicha ma’lumotlarni byuroga taqdim etishda misli ko‘rilmagan keng ko‘lamli choralar qabul qilindi: ma’lumotlar buzib ko‘rsatilishining oldini olish maqsadida serverlar, ma’lumotlar bazalari, kompyuter texnikasi muhrlandi. 1-iyundan boshlangan xatlovning 15 kuni davomida umumiy summasi 50 milliard so‘m bo‘lgan fuqarolarga noqonuniy qarzdorlik hisoblanishi bilan bog‘liq 13 ta holat aniqlandi. Ularning barchasi bo‘yicha jinoiy ishlar qo‘zg‘atildi.
“Biz barcha og‘riqli muammolardan xabardormiz. O‘tkazilayotgan tadbirlar davomida qonun buzilishiga yo‘l qo‘ymaslik uchun barcha choralar ko‘rilmoqda. Yaratilayotgan yangi tizim o‘zining samaradorligini amalda ko‘rsatishi lozim”, — dedi prokuratura vakili.
Izoh (0)