Avvalroq, Facebook ijtimoiy tarmog‘i foydalanuvchisi Ilham Saymanov Toshkent—Nukus reysi orqali uchadigan samolyotga chipta sotuvchilarini tanqid qilgandi.
Ushbu ijtimoiy tarmoqning yana bir foydalanuvchisi Narimmat Yo‘ldashev Toshkent—Urganch temiryo‘l yo‘nalishi uchun chipta sotib olishdagi sarsongarchiligi haqida so‘zlab berdi, deb xabar qildi “KRuz.uz”. Nashr Narimmat Yo‘ldashevning fikrlarini keltirib o‘tdi.
“Barchaga ma’lumki yo‘lovchi tashish bilan shug‘ullanish arzon ish emas, ammo mana shu monopolist yo‘lovchi tashish bilan shug‘ullanuvchi tashkilotlarda chipta sotish bilan shug‘ullanuvchi kassirlarni ish haqini sotgan chiptasining soni va pul tushimiga mutonosib qilib belgilanmas ekan, chipta sotishdagi korrupsiya yo‘q bo‘lmaydi .
Men ayolim bilan Toshkentda davolanishga borgan edim, Davolanish kursi 10 kun. Shifoxanadan chiqishimizga 5 kun qolganida Toshkent temir yo‘l vokzalida oldindan chipta sotish bilan shug‘ullanuvchi kassaga bordim va ichki yo‘nalish bo‘yicha chipta sotayotgan 10-kassaga navbatga turdim.
Navbatda turishim mobaynida yarim soatlardan keyin 11-kassaning tushlik vaqti tugab yoshgina qizcha kassaga kirib keldi . Men o‘zimning va ayolimning shaxsini tasdiqlovchi hujjatlarni kassir qizga uzatib, menga 24 yoki 25-iyunga Urganchga ketadigan poyezdning kupesidagi pastki o‘rindiqlardan 2 ta chipta berishini so‘radim. Kassir hujjatlarga bir nazar solib “siz qaraqolpog‘istonlik ekansiz shuning uchun Urganchga chipta berolmayman. Qaraqolpog‘istonga boradigan poyezdlargagina chipta olishingiz mumkun”, dedi. Menga Urganch qulay, Urganch 21 km ,To‘rtko‘l 30 km va Nukus 130 km, shuning uchun menga Urganchga chipta sotishini talab qilsam, “endi siz bilan gaplashmayman, boring boshqa kassalarga” deb hujjatlarimni oldimga tashladi.
Keyin kassalar bo‘yicha navbatchi smena boshlig‘ini qidirsam u yo‘q ekan, birozdan keyin kassirlar tarafidagi eshik ochilib, baland bo‘yli yosh bo‘lishiga qaramay tepa sochi to‘kila boshlagan yirik gavdali temiryo‘lchilar formasini kiygan yigit chiqib keldi . Unga “Kassalar bo‘yicha smena boshlig‘i kim?” deya bergan savolimga “Men” deb javob berdi .
Men unga vaziyatni tushuntirdim. O‘zimning Chernobilchi 2-guruh nogiron ekanligim va ayolimning qandli diabet bilan og‘rishi sabab bizga kupe vagonidagi pastki joylardan 2 ta chipta kerak ekanligi hamda 11-kassadagi kassirning harakatlaridan noroziligimni aytdim.
O‘zini smena boshlig‘i deb tanishtirgan xodim “o‘sha qiz bekorlarni aytibdi, sizga bilet sotishga majbur, boring smena boshlig‘i aytdi deng”, deb o‘zi kimlar uchundir telefondan Rossiyaga chipta topib berish va bu chiptalar qanchaga tushishi haqida tushuntirish bilan ovora bo‘lib ketdi.
Men oldin yarim soat navbat kutganim 11-kassaga yana yarim soatdan keyin smena boshlig‘i aytgan gaplardan dadillashib keldim. Ammo 11-kassada o‘tirgan qizcha ham anoyilardan emasga o‘xshaydi. Men unga “Meni smena boshlig‘i jo‘natdi. Menga Urganchga 2 ta chipta kupeyni vagonga bering” degan gapimga “o‘sha smena boshlig‘ining o‘zi bersin chiptani, men sizga chipta sotmayman” dedi .
Keyin men o‘sha yerdagi odamlardan temir yo‘l kassalari rahbarlari o‘tiradigan joyni aniqlab, kassalarning kun chiqar tarafidagi imoratga kirib borsam, pastda 1-qavatda o‘tirgan navbatchi xodim soat 13:00 bo‘lganini va barcha xodimlar va rahbarlar tushlikka chiqib ketganligi sabab soat 14:00 da kelishimni aytdi.
Shu atrofda 1 soat aylanib yurib soat 14:00 lardan o‘tib yana bordim o‘sha idoraga, navbatchi meni ko‘rishi bilan 4-qavatdagi Sur’at degan odamga murojaat qilishim mumkinligini aytib, ichkari kiritib yubordi . Sur’at degan yigitni 4-qavatdan topib so‘z boshlagan edim muddaomni tushunib, qachon va qayerga chipta kerak deb so‘radi. Men 24 yoki 25-iyunlarga Urganchga 2 ta kupeyni kerak desam, “u kunlarga iloji yo‘q, lekin 26- iyunga 2 ta kupeni qilib berishi mumkinligini aytdi” va telefondan kimgadir qo‘ng‘iroq qilib, menga 26-iyunga 2 ta kupeni chipta sotishni tayinladi va menga 1-sonli bron kassasiga borishimni tayinladi.
Men pastga tushib 1-kassada o‘tirgan ayolga “men to‘g‘rimda hozir sizga qo‘ng‘iroq qilishdi, menga Urganchga 2 ta chipta kupeyni vagondan iloji boricha pastgi joylardan”, deb hujjatlarimni uzatsam, u menga hujjatlarimni qaytarib berib “hech qanday qo‘ng‘iroq bo‘lgani yo‘q, Urganchga umuman chipta yo‘q dedi”.
Men yana Sur’atni oldiga chiqishga majbur bo‘ldim. U Kassirga: “Men sizga hozirgina qo‘ng‘iroq qildim, nega odamlarni ovora qilaverasizlar”, deb qattiqroq telefondan gapirganidan keyin, haligi kassir ayolning “siz aytgan odam oldimga kelmadi, kelsa darrov bervoraman”, degan ovozi eshtildi.
Shundan keyin Surat “Boring, hozir sizga bilet beradi”, deganidan keyin yana pastga tushib o‘sha 1-bron kassasiga borib 2 ta chipta kupeni vagonga faqat bir joy pastdan, bir joy yuqoridan berdi, mening iloji bo‘lsa ikkalasini ham pastki joydan bo‘lsin degan iltimosimga, “hech ham iloji yo‘q” deb javob berdi .
Ana endi kutilgan 26-iyun soat 19:30 larda Toshkent — Shovot poyezdiga odamlar chiqa boshladi, 20:20 da poyezd yo‘lga tushdi.
Sizga yolg‘on menga chin ne ko‘z bilan ko‘rayki biz chiqqan 6-vagonga bor yo‘g‘i 10 tacha odam chipta bilan chiqdi. Yo‘lda chiqqanlar bilan vagondagi 36 o‘rinda ko‘pi bilan 18 ta o‘rin band bo‘ldi, qolgan teng yarmi Urganchgacha bo‘sh keldi.
Biz chiqqan 1-kupeda er-xotin ikkimizdan boshqa bironta ham odam Urganchgacha chiqmadi…
Yuqorida bo‘lib o‘tganlardan kelib chiqib, O‘zbekiston Temir Yo‘llari hissadorlik kompaniyasi tarkibida ishlovchi kassirlar, bular o‘zlari ishlayotgan kompaniyaning rivoji uchun ishlayaptimi yoki kimlardir tarafidan yollangan qo‘poruvchilarmi (dushmanlar), negaki keyingi paytda birorta yirik kompaniya yoki korxonani arzon garovga sotib olish uchun, oldin o‘shani bankrot, ya’ni inqirozga uchratib keyin arzon garovga sotib olinadi degan gap tez-tez ishlatilmoqda.
Prezidentimiz va hukumatimiz xalq farovonligini taminlash yo‘lida qanchadan-qancha harakatlar qilayotgan bir paytda bu kabi ko‘rinishlar va harakatlarni faqat dushmanlargina qilishi mumkin”.
Izoh (0)