Ўзбекистон Республикаси Бош прокуратураси 1 июндан бери фуқароларга коммунал хизматлар учун ноқонуний қарздорлик ҳисоблаш билан боғлиқ 13 та ҳолатни аниқлади. Бу ҳақда Халқаро пресс-клубнинг 28 июнь, чоршанба куни бўлиб ўтган йиғилишида Бош прокуратура вакили маълум қилди, дея хабар беради «Коммерсантъ.uz».
Маълумки, Бош прокуратура ҳузурида энергия ресурслари учун тўловларнинг ўз вақтида ва тўлиқ ундирилишига, электр ва газ тақсимлаш тармоқларига ноқонуний уланиш ҳамда талон-тарож қилиш ҳолатларини аниқлаш, бартараф этиш ва олдини олишга, шунингдек, суд ҳужжатларининг сўзсиз ижросини таъминлашга масъул бўлган Мажбурий ижро бюроси ташкил этилди.
Бош прокуратура вакилига кўра, қарздорлик суммаси бўйича маълумотларни бюрога тақдим этишда мисли кўрилмаган кенг кўламли чоралар қабул қилинди: маълумотлар бузиб кўрсатилишининг олдини олиш мақсадида серверлар, маълумотлар базалари, компьютер техникаси муҳрланди. 1 июндан бошланган хатловнинг 15 куни давомида умумий суммаси 50 миллиард сўм бўлган фуқароларга ноқонуний қарздорлик ҳисобланиши билан боғлиқ 13 та ҳолат аниқланди. Уларнинг барчаси бўйича жиноий ишлар қўзғатилди.
«Биз барча оғриқли муаммолардан хабардормиз. Ўтказилаётган тадбирлар давомида қонун бузилишига йўл қўймаслик учун барча чоралар кўрилмоқда. Яратилаётган янги тизим ўзининг самарадорлигини амалда кўрсатиши лозим», — деди прокуратура вакили.
Изоҳ (0)