O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi raisi Abdushukur Abdullayevning virtual qabulxonasida ilk bor fuqarolarning videomurojaatlarini qabul qilish imkoniyati yaratildi. Bu haqda “Daryo”ga qo‘mita matbuot xizmati ma’lum qildi.
Qo‘mita raisiga yer, kadastr va sohaga boshqa taalluqli masalalar bilan:
Yozma ravishda, virtual qabulxona orqali;1097 qisqa raqami orqali xabar qoldirish;Qo‘mitaning Facebook’dagi sahifasiga yozish;Videokonferens aloqa orqali shaxsan murojaat etish mumkin.
Virtual qabulxonada fuqarolarning shikoyat va savollarini qabul qilish kunu tun amalga oshiriladi. 1097 raqamli “Ishonch telefoni” ham shunday tartibda ishlaydi.
Qayd etish joizki, bu real vaqt tartibidagi videotranslyatsiyalar imkoniyatiga ega bo‘lgan birinchi multikanal virtual qabulxona hisoblanadi. Har hafta shanba kuni soat 10:00 dan 12:00 gacha fuqarolar qo‘mita raisi bilan buning uchun maxsus tashkil etilgan teleko‘prik orqali shaxsan bog‘lanishi mumkin. Teleko‘prik mamlakat miqyosida o‘tkaziladi va fuqarolar murojaatlari natijalari ijtimoiy tarmoqlar va qo‘mitaning rasmiy saytida taqdim etib boriladi.
Abdushukur Abdullayevning sinov tariqasidagi ilk videoqabuli joriy yil 1-iyulida o‘tkaziladi.
Viloyatlardagi fuqarolar bilan videomuloqot qo‘mitaning hududiy bo‘limlarida amalga oshiriladi. Bunga imkoni bo‘lmagan fuqarolar videomurojaatlarni virtual qabulxonaga fayl tariqasida yuklab jo‘natishi mumkin.
Izoh (0)