“Toshshahartransxizmat” kompaniyasi tizimidagi avtobus saroylari yo‘nalishlarida 3-iyuldan yo‘lovchilar oqimini o‘rganish ishlari olib boriladi. Bu haqda kompaniya matbuot xizmati ma’lum qildi.
O‘rganish ishlari yo‘lovchilar tashishni tashkil qilish samaradorligini oshirish, avtobus yo‘nalishlarini yanada optimallashtirish, harakatlanadigan tarkibning ratsional miqdorini aniqlash maqsadida amalga oshiriladi.
Shu munosabat bilan, “Toshshahartransxizmat” ma’muriyati yo‘lovchilardan o‘rganish davomida faol ishtirok etishni, yo‘l haqini o‘z vaqtida to‘lab borishni hamda bir martalik chiptalarni chipta sotuvchilardan talab qilishni iltimos qilgan.
Ko‘rsatilayotgan yo‘lovchi tashish xizmatlari sifati bo‘yicha taklif va e’tirozlarni “Toshshahartransxizmat”ga kompaniyanig sayti yoki 1062 raqamli ishonch telefoni orqali yo‘llash mumkin.
Kompaniya yo‘lovchilar oqimini o‘rganish ishlari qachongacha davom etishi haqida qo‘shimcha axborot bermagan.
“Gazeta.uz”ning yodga solishicha, O‘zbekiston poytaxtida 2014-yil bahorida ham yo‘lovchi tashish transportining barcha turlari, jumladan, metro, avtobuslar, tramvaylar va yo‘nalishli taksilarda yo‘lovchi oqimi komples o‘rganilgan edi.
Izoh (0)