“O‘zneftmahsulot”: Viloyatlardagi benzin taqchilligi — sun’iy

Ayni kunlarda O‘zbekistonning Andijon, Xorazm, Buxoro viloyatlari va Qoraqalpog‘iston Respublikasida kuzatilayotgan yonilg‘i taqchilligi sun’iy ravishda yuzaga kelmoqda. Bu haqda, “O‘zneftmahsulot” kompaniyasi matbuot xizmati bayonotiga asoslanib, UZ24 xabar bermoqda.

Viloyatlarda, xususan, Andijonda benzin yetishmovchiligi haqida Facebook foydalanuvchilari yozmoqda. Ulardan biri avtomobillarga yonilg‘i quyish shoxobchasi (AYQSh)ga benzin faqat 27-iyun kuni kelganini va bu benzinning litrini 4 ming so‘mdan sotib olganini ma’lum qilgan: “AYoQShlarda benzin yo‘q, lekin ko‘chadan 4 ming, 4,5 ming so‘mga olsa bo‘ladi”.

“Bugun ertalab mashinamga 40 litr yonilg‘i quydim. Mashina juda ko‘p, AYQShning to‘rtta qatori baravar ishladi va menga 12 daqiqada navbat ketdi. Soat 11:00 da esa benzin qolmadi”, — deb yozgan boshqa bir foydalanuvchi.

“O‘zneftmahsulot” ma’lumotlariga ko‘ra, haftada 2—3 marotaba hududlardagi avtomobillarga yonilg‘i quyish shoxobchalari (AYQSh)larda benzin yo‘qligidan shikoyat qilib qo‘ng‘iroq qilayotganlar bor, shikoyatlarda chayqovchilarning yonilg‘ini ko‘chada noqonuniy sotayotgani ham aytilmoqda.

Respublika bo‘ylab barcha AYQShlarga yonilg‘i yetkazib berish jadval asosida bajariladi. Kunning issiq bo‘lishi va xavfsizlik sababli yonilg‘i erta tongdan sotila boshlaydi. Kunning yarmiga kelib benzin tugaydi. Lekin bu benzin taqchilligining asosiy sababi emas. Xususiy AYQShlar qo‘shimcha daromad olish maqsadida yonilg‘ini olib-sotarlarga pullaydi va natijada sun’iy taqchillik yuzaga keladi.

“O‘zneftmahsulot” bayonotidan