2017-yildan boshlab Qozog‘istonda Ravon Nexia R3, LadaVesta, Xray, Largus, IvecoCrossway avtobuslari, Iveco NewDaily maktab avtobuslari, shuningdek, UzAvtotrailer tirkamalari ishlab chiqarilmoqda. Bu haqda “1news.uz” xabar berdi.
Qozog‘iston avtobiznes assotsiatsiyasi ma’lumotlariga ko‘ra, mamlakatda joriy yil 5 oyi mobaynida avtomobillar ishlab chiqarish o‘tgan yilning shu davriga nisbatan 4 barobardan oshiqroq ko‘paydi. Yengil va tijoriy texnika chiqarilishi o‘tgan yil ko‘rsatkichlaridan 440 foiz ko‘proq bo‘ldi.
Jami yanvardan may oyiga qadar Qozog‘istonda umumiy qiymati 40 milliard tengedan (123 million dollar atrofida) oshiq bo‘lgan 6803 avtomobil, jumladan, yengil va yuk avtomobillari, avtobuslar ishlab chiqarildi. Bunga qishloq xo‘jaligi texnikasi, treylerlar va yarim tirkamalar kirmagan.
Qozog‘istonda ishlab chiqarilgan avtomobillar sotuvi ham ishlab chiqarishga mutanosib tarzda ortib bormoqda. May oyidagi umumiy sotuv hajmida ularning ko‘rsatkichi 36,4 foizni tashkil etdi. 2017-yilda jami 5243 dona mahalliy avtomobil sotildi.