O‘zbekiston milliy terma jamoasi bosh murabbiyi Samvel Babayan Konfederatsiyalar kubogi musobaqasini ko‘rish uchun Rossiyaga yo‘l oldi. Bu haqda “Championat.asia” sayti xabar berdi.
Babayanga birorta ham o‘zbekistonlik futbolchi to‘p surmaydigan Konfederatsiyalar kubogi nega kerak bo‘lib qolgani va u musobaqaning qaysi o‘yinlarini tomosha qilishi borasida aniq ma’lumotlar yo‘q.
Qayd etish kerak, ertaga — 21-iyun kuni Xalqaro press-klub O‘zbekiston milliy terma jamoasi murabbiylari va O‘FF rahbariyati ishtirokida anjuman tashkil qilishni rejalashtirgandi. Babayan o‘sha anjumanda ishtirok etish uchun yetib keladimi yoki yo‘q — hozircha aniq emas.
Samvel Babayan murabbiylik qilayotgan O‘zbekiston milliy terma jamoasi JCh—2018 saralashining hal qiluvchi bosqichida 8 ta o‘yin o‘tkazib, shularning teng yarmini boy berdi va 12 ochko jamg‘arishga muvaffaq bo‘ldi. Bungacha qoniqarsiz natija qayd etgan Janubiy Koreya, Qatar va Xitoy termalarida bosh murabbiylar iste’fosi kuzatilgan bo‘lib, faqatgina O‘FF saralash sikli yakuniga qadar Babayanga ishonishga qaror qilgandi.
Izoh (0)