O‘zbekiston tashqi ishlar vaziri Abdulaziz Komilov 5-iyul kuni vatandoshlar bilan to‘g‘ridan-to‘g‘ri muloqot o‘tkazadi. TIV matbuot xizmati axborotiga ko‘ra, vazirga hozirdanoq murojaatlar kelib tushmoqda.
Murojaatlarning asosiy qismini xorijga chiqish va xorijdan qaytish, xorijda bo‘lgan vaqtda yordam olish, shuningdek, O‘zbekistonning tashqi siyosiy faoliyati bilan bog‘liq masalalar tashkil etadi.
Ayni vaqtda, TIV matbuot xizmatining alohida qayd etishicha, “O‘zbekiston terma jamoasining so‘nggi xalqaro o‘yinlari natijalaridan ranjigan futbol muxlislari nomidan tushgan murojaat haqida ham vazir xabardor qilingan”.
Tashqi ishlar vazirligidan ma’lum qilishlaricha, “barcha murojaatlar ro‘yxatga olinmoqda”, murojaatlar o‘rnatilgan tartibda ko‘rib chiqilgach, fuqarolarga rasmiy javoblar va tegishli izohlar beriladi.
Ma’lumot uchun, futbol bo‘yicha O‘zbekiston milliy terma jamoasi 12-iyun kuni JCh—2018 saralash bahslari doirasida Tehronda Eronga 0:2 hisobida imkoniyatni boy berdi. Mazkur uchrashuvdan so‘ng futbol jamoatchiligi milliy terma bosh murabbiyi Samvel Babayanning iste’fosini talab qilgan edi.
O‘zbekiston futbol federatsiyasi 15-iyun kuni maxsus bayonot bilan chiqish qilib, Babayan boshliq murabbiylar shtabi kamida 5-sentabrga qadar ishlashini ma’lum qildi — shu kuni milliy terma JCh—2018 saralashidagi so‘nggi o‘yinni o‘tkazadi.
Izoh (0)