Hindistonning Kerala shtatida yashovchi ayol Saudiya Arabistonidan Hindistonga uchayotgan samolyot bortida, 10 ming metr balandlikda farzand ko‘rdi, deb yozadi “RIA Novosti”.
Hodisa 18-iyun, yakshanba kuni Jet Airways aviakompaniyasining Ad-Dammamdan Kochchiga yo‘l olgan samolyotida yuz berdi. Bortda o‘sha vaqtda 162 yo‘lovchi bo‘lgan. Ayolda tulg‘oq boshlangach, samolyot ekipaji shoshilinch tibbiy yordamni talab etadigan favqulodda vaziyat haqida e’lon qilgan, shundan so‘ng samolyot o‘z yo‘nalishini o‘zgartirib, Mumbay aeroportiga eson-omon qo‘ngan.
Yo‘lovchi ayolning farzandini dunyoga keltirishda ekipaj a’zolariga Keralaga uchayotgan hamshira yordam berdi. Samolyot qo‘ngach, ona va bolani mahalliy kasalxonaga yetkazishdi. Ularning salomatligi barqaror deb baholanmoqda.
Havo kemasi Mumbayga qo‘nganidan keyin Kochchiga reysni davom ettirdi.
Aviakompaniya xabariga ko‘ra, bu Jet Airways samolyotlari bortida bola tug‘ilishi bilan bog‘liq ilk holatdir. Shu tufayli, chaqaloqqa butun umri davomida tashuvchining reyslaridan bepul foydalanish huquqi taqdim etildi.
Izoh (0)