Ҳиндистоннинг Керала штатида яшовчи аёл Саудия Арабистонидан Ҳиндистонга учаётган самолёт бортида, 10 минг метр баландликда фарзанд кўрди, деб ёзади «РИА Новости».
Ҳодиса 18 июнь, якшанба куни Jet Airways авиакомпаниясининг Ад-Даммамдан Коччига йўл олган самолётида юз берди. Бортда ўша вақтда 162 йўловчи бўлган. Аёлда тулғоқ бошлангач, самолёт экипажи шошилинч тиббий ёрдамни талаб этадиган фавқулодда вазият ҳақида эълон қилган, шундан сўнг самолёт ўз йўналишини ўзгартириб, Мумбай аэропортига эсон-омон қўнган.
Йўловчи аёлнинг фарзандини дунёга келтиришда экипаж аъзоларига Кералага учаётган ҳамшира ёрдам берди. Самолёт қўнгач, она ва болани маҳаллий касалхонага етказишди. Уларнинг саломатлиги барқарор деб баҳоланмоқда.
Ҳаво кемаси Мумбайга қўнганидан кейин Коччига рейсни давом эттирди.
Авиакомпания хабарига кўра, бу Jet Airways самолётлари бортида бола туғилиши билан боғлиқ илк ҳолатдир. Шу туфайли, чақалоққа бутун умри давомида ташувчининг рейсларидан бепул фойдаланиш ҳуқуқи тақдим этилди.
Изоҳ (0)