O‘zbekiston Savdo-sanoat palatasining 20-iyunda bo‘lib o‘tgan navbatdan tashqari qurultoyida Adham Ikromov palataning ijroiya qo‘mitasi raisi etib saylandi. Bu haqda “Gazeta.uz” xabar bermoqda.
Qurultoy ishida bosh vazir Abdulla Aripov ishtirok etdi. Mamlakat Prezidenti tomonidan tavsiya etilgan Adham Ikromov nomzodini qurultoyga taqdim etgan hukumat rahbari u bilan ko‘p yillar birga ishlaganini va uni eng qiyin topshiriqlarni bajara oladigan juda mas’uliyatli kishi sifatida bilishini ta’kidladi.
Adham Ikromov 1997-yildan buyon turli rahbarlik vazifalarida ishlab kelgan, shu jumladan sog‘liqni saqlash vaziri va vazirning birinchi o‘rinbosari, bosh vazir o‘rinbosari. Palata raisligiga saylanishidan oldin Adham Ikromov Prezident davlat maslahatchisining birinchi o‘rinbosari va bir vaqtning o‘zida Prezident huzuridagi Davlat boshqaruvi akademiyasi rektori lavozimida faoliyat yuritayogan edi.
“Adham Ikromov davlat rahbarining yuksak ishonchiga sazovor bo‘ldi. U yetakchilik sifatlariga hamda yuksak tajriba va obro‘ga ega”,— dedi Abdulla Aripov. Bosh vazirning qo‘shimcha qilishicha, Adham Ikromov Toshkentda ishlovchi boshqa rahbarlardan farqli ravishda mamlakatning turli hududlarida bo‘lgan va joylardagi vaziyat bilan tanish.
Prezidentning 19-iyundagi farmoniga asosan Savdo-sanoat palatasiga yangi imkoniyat va huquqlar berildi. Adham Ikromov bu imkoniyat va huquqlardan to‘la hajmda foydalanishi mumkinligi bosh vazir tomonidan ishonch bilan qayd etildi. Adham Ikromovning nomzodi ma’qullandi.
Nashrning ma’lumotlariga ko‘ra, 2006-yilning aprelidan buyon Savdo-sanoat palatasini boshqarib kelgan Alisher Shayxov faoliyatini O‘zbekistonning xorijdagi diplomatik vakolatxonalaridan birida davom ettirishi kutilmoqda.
Shuningdek, qurultoyda Savdo-sanoat palatasi raisining to‘rt nafar o‘rinbosari — Islom Jasimov, Botirjon Asadov, Jamshid O‘roqov va O‘tkir Bo‘tayev saylandi.
Bundan tashqari, palataning 25 kishidan iborat prezidiumi bir ovoz bilan saylandi. Prezidiumni palata raisi boshqaradi va unga to‘rt o‘rinbosar ham kiradi.
Izoh (0)