Belgiya qiroli Filipp birinchi marta asli marokashlik bo‘lgan, Gent shahrida istiqomat qiladigan oilaning uyidagi iftorda qatnashdi, deb yozadi “TASS”.
Uy egasi, uning sakkiz o‘g‘li va ularning oilalari bilan birga qirol Filipp sutli xurmodan tatib ko‘rdi, shuningdek, Ramazon oyi hikmati va ro‘za tutish foydasi haqidagi gaplarga quloq tutdi. Ramazonning diniy ma’nosi haqida Belgiya qiroliga uy egasining o‘g‘illaridan biri, Gentdagi eng yirik masjidlardan birining imomi, shuningdek, Flandriya ta’lim departamenti xodimi gapirib berdi.
Ta’kidlanishicha, Belgiya qirolining ushbu an’anada ishtirok etishi mamlakat musulmon aholisining integratsiyasi uchun muhim ramziy voqea bo‘lgan.
Rasmiy ma’lumotlarga ko‘ra, Belgiyada 11 million aholiga 800 ming musulmon to‘g‘ri keladi. 2000-yilda ularning soni 400 mingga yaqin bo‘lgan. Mamlakatda qariyb 350 ta rasman tan olingan masjidlar faoliyat olib boradi.
Izoh (0)