Бельгия қироли Филипп биринчи марта асли марокашлик бўлган, Гент шаҳрида истиқомат қиладиган оиланинг уйидаги ифторда қатнашди, деб ёзади «ТАСС».
Уй эгаси, унинг саккиз ўғли ва уларнинг оилалари билан бирга қирол Филипп сутли хурмодан татиб кўрди, шунингдек, Рамазон ойи ҳикмати ва рўза тутиш фойдаси ҳақидаги гапларга қулоқ тутди. Рамазоннинг диний маъноси ҳақида Бельгия қиролига уй эгасининг ўғилларидан бири, Гентдаги энг йирик масжидлардан бирининг имоми, шунингдек, Фландрия таълим департаменти ходими гапириб берди.
Таъкидланишича, Бельгия қиролининг ушбу анъанада иштирок этиши мамлакат мусулмон аҳолисининг интеграцияси учун муҳим рамзий воқеа бўлган.
Расмий маълумотларга кўра, Бельгияда 11 миллион аҳолига 800 минг мусулмон тўғри келади. 2000 йилда уларнинг сони 400 мингга яқин бўлган. Мамлакатда қарийб 350 та расман тан олинган масжидлар фаолият олиб боради.
Изоҳ (0)