O‘zbekiston adliya vazirligi Buxoro viloyatidagi Mir Arab oliy madrasasini diniy ta’lim muassasasi sifatida ro‘yxatdan o‘tkazdi. Bu haqda, adliya vazirligining matbuot xizmatiga asoslanib, “Gazeta.uz” xabar bermoqda.
Madrasa rektori vazifasini bajaruvchi etib ilgari bu yerda xizmat qilgan Jobir Elov tayinlandi.
XVI asrda qurilgan Mir Arab madrasasining maqomini tiklash zarurati haqida Shavkat Mirziyoyev mart oyida viloyatga uyushtirgan safari chog‘ida aytib o‘tgan edi.
O‘zbekiston muftiysi Usmonxon Alimov ro‘yxatdan o‘tish to‘g‘risidagi guvohnomaning topshirilish marosimida oliy madrasaning yaratilishi islom asoslarining chuqur o‘rganilishi hamda mamlakatda diniy bag‘rikenglikni ta’minlashda muhim ahamiyatga ega ekanligini ta’kidladi.
Shuningdek, u muassasa islom olamida shuhrat qozongan Imom al-Buxoriy, Imom at-Termiziy, Bahovuddin Naqshband singari yetuk olim va mutafakkirlarni yetishtirib berishiga ishonch bildirdi.
Mir Arab oliy madrasasi bilan bir qatorda Mir Arab maxsus o‘rta ta’lim dargohi ham faoliyat yuritishda davom etadi.
Izoh (0)