Ўзбекистон адлия вазирлиги Бухоро вилоятидаги Мир Араб олий мадрасасини диний таълим муассасаси сифатида рўйхатдан ўтказди. Бу ҳақда, адлия вазирлигининг матбуот хизматига асосланиб, «Газета.uz» хабар бермоқда.
Мадраса ректори вазифасини бажарувчи этиб илгари бу ерда хизмат қилган Жобир Элов тайинланди.
XVI асрда қурилган Мир Араб мадрасасининг мақомини тиклаш зарурати ҳақида Шавкат Мирзиёев март ойида вилоятга уюштирган сафари чоғида айтиб ўтган эди.
Ўзбекистон муфтийси Усмонхон Алимов рўйхатдан ўтиш тўғрисидаги гувоҳноманинг топширилиш маросимида олий мадрасанинг яратилиши ислом асосларининг чуқур ўрганилиши ҳамда мамлакатда диний бағрикенгликни таъминлашда муҳим аҳамиятга эга эканлигини таъкидлади.
Шунингдек, у муассаса ислом оламида шуҳрат қозонган Имом ал-Бухорий, Имом ат-Термизий, Баҳовуддин Нақшбанд сингари етук олим ва мутафаккирларни етиштириб беришига ишонч билдирди.
Мир Араб олий мадрасаси билан бир қаторда Мир Араб махсус ўрта таълим даргоҳи ҳам фаолият юритишда давом этади.
Изоҳ (0)