Fransiya prezidenti Emmanuel Makronning “Olg‘a!” partiyasi 32,32 foiz ovoz to‘plab parlament saylovlarida g‘alaba qozondi. Bu haqda Le Figaro nashri Fransiya IIVga asoslanib ma’lum qildi, deb xabar berdi “RBK”.
Ushbu ko‘rsatkich partiyaga keyin turda ishtirok etish imkoniyatini beradi. Shunday qilib “Olg‘a!” partiyasi parlamentdagi 577 o‘rindan 440 tasini egallashi mumkin, deya taxmin qilinmoqda.
Ikkinchi o‘rinni “Respublikachilar” partiyasi 21,56 foiz ovoz bilan egalladi, uchinchi pog‘onani esa “Yengilmas Fransiya” ittifoqi Fransiya kommunistik partiyasi bilan birgalikda 13,74 foiz ovoz bilan band etdi. Marin Le Penning “Milliy front” partiyasi esa atigi 13,2 foiz ovoz to‘plashga muvaffaq bo‘ldi. Ikkinchi turga o‘tish uchun kamida 12,5 foiz ovoz to‘plash kerak.
Saylovda rekord darajada kam, ya’ni saylovchilarning 48,71 foizi ishtirok etdi. Bundan oldingi eng past ko‘rsatkich 2012-yilda qayd etilgan. O‘shanda saylovchilarning 57 foizi ishtirok etgan edi.
Ovoz berishning ikkinchi turi 18-iyun kuni bo‘lib o‘tadi.
Izoh (0)