Tehrondagi teraktlarning ijrochilari Mosul va Raqqada IShID uchun jang qilgan

Eron axborot va milliy xavfsizlik vazirligi Tehronda 7-iyun kuni yuz bergan teraktlarda qatnashgan besh jangarining shaxsini aniqlashga muvaffaq bo‘lganini e’lon qildi. Bu haqda “Gazeta.ru” xabar bermoqda.

Qayd etishlaricha, ularning bari Suriya va Iroqda IShID terrorchilik tashkiloti safida jang qilgan.

“Hujum qilgan besh nafarning bari eronlik... Ular avvalroq Eronni tark etib, terrorchilik tashkilotining Raqqa va Mosuldagi jinoyatlarida qatnashgan”, — deyiladi vazirlik bayonotida.

Bayonotga ko‘ra, ular 2016-yili “mamlakatning muqaddas shaharlarida teraktlar uyushtirish maqsadi” bilan Eronga qaytgan.

7-iyun kuni Tehrondagi Eron parlamenti binosi va shahardan janubdagi imom Xumayniy maqbarasiga terrorchilik hujumlari amalga oshirildi.

So‘nggi ma’lumotlarga ko‘ra, hodisa oqibatida 17 kishi halok bo‘lgan. Teraktlar uchun javobgarlikni IShID o‘z zimmasiga olgan.