Америкалик аёл тарбия мақсадида бир яшар қизини илон чақишига йўл қўйиб берди (видео)

АҚШнинг Флорида штати полицияси бир яшар қизини илон чақишига йўл қўйиб берган аёлнинг ишини текширмоқда, деб ёзади «Вести.ru». Исм-шарифи ошкор этилмаётган аёлнинг айтишича, у буни тарбия мақсадларида қилган. «Дарс» видеосини у Facebook‘даги саҳифасига жойлади.

Кадрларда кичик илон (чипор илон) ўзига қўл чўзаётган қизчани тишлаб олганини кўриш мумкин. Қизча йиғлашни бошлаган, воқеани видеога олаётган она эса кулган. Норозиликлар ёғилгач, аёл ушбу роликни Facebook‘дан ўчириб ташлади.

Журналистларга берган интервьюсида аёл томошабинлар «ўта кўнгилчан» эканлигини айтди. «Бу илон мени ва ўғлимни бир неча марта тишлаган. У умуман безарар. Унинг тишлари шунчалик майдаки, у чақалоқнинг терисини ҳам тишлаб ололмайди. Қизим оғриқдан эмас, қўрққанидан йиғлаб юборди», — деди у.

«Энди қизим илонларга қўл теккизмайди. У улардан қўрқмайди, лекин уларга тегмайди ҳам — мақсадим ҳам шу эди. Ҳеч қачон ўз фарзандимга атайлабдан зарар етказмаган бўлардим», — дея қўшиб қўйди аёл.

Ҳозирча аёлга нисбатан жиноий иш қўзғатилгани йўқ.