“Internet qirolichasi” 2017-yilning asosiy trendlarini ma’lum qildi

Kremniy vodiysiga asoslangan Kleiner Perkins Caufield & Byers venchur investitsiya firmasi navbatdagi yillik “Internet tendensiya — 2017” hisobotini taqdim etdi. Hisobot butunjahon tarmog‘ida sodir bo‘layotgan voqealarning kompleks kuzatuvi natijasi hisoblanadi. Hisobotni internet va yangi texnologiyalar sohasida butun dunyoda tan olingan ekspert Meri Miker tayyorlagan. “RBK” hisobotdan o‘rin olgan asosiy trendlar ro‘yxatini taqdim etdi.

Internet globallashmoqda

Internetning tarqalishi, avvalgidan sekinroq tempda bo‘lsa ham, davom etmoqda. 2016-yilda butunjahon tarmog‘idan foydalanuvchilar soni 10 foizga, yoki uch milliarddan 3,4 milliardga o‘sdi. Bu Yer aholisining yarmiga yaqinini tashkil qiladi.

Adblock tizimi ommalashmoqda

Internet-reklama hajmining oshishi bilan parallel ravishda uni bloklashga xizmat qiluvchi Adblock tizimiga ham talab o‘smoqda. Bunday mobil dasturlardan foydalanuvchilar soni 2016-yilda 220 million kishiga yetgan. Shaxsiy kompyuterlarda ulardan foydalanuvchilar esa 400 million kishiga yaqinlashgan.

Internet yaqin orada reklama bo‘yicha TVni ortda qoldiradi

Jahon internet-reklama bozorining hajmi o‘sishda davom etmoqda va yaqin yarim yil ichida 200 milliard dollarni tashkil qilib, televizion reklama bozori hajmidan oshib ketadi.

2016-yilda insoniyat 14 zettabayt yoki 14 trillion gigabayt ma’lumot to‘pladi. 2020-yilga borib bu ko‘rsatkich 47 zettabaytga yetadi.

Mobil trafik

Internet-trafik tizimidagi mobil trafikning ulushi butun dunyoda oshib bormoqda.  Bu poygada Nigeriya va Hindiston yetakchi hisoblanadi. Bu mamlakatlarda internet-trafikning 80 foizi mobil qurilmalarga to‘g‘ri keladi.

Kompyuter o‘yinlari

Interaktiv kompyuter o‘yinlarini o‘ynovchilar soni 2016-yilda 2,6 milliardni tashkil qilgan. 1995-yilda ularning soni 100 million bo‘lgan xolos. 2016-yilda kompyuter o‘yinlari hajmi 100 milliard dollarni tashkil qilgan.

Spam va ma’lumotlarni o‘g‘irlash

Kuzatuvchilar ma’lumotlariga ko‘ra, internetdagi xavf yildan-yilga oshib bormoqda. 2016-yilga kelib spamlarning o‘rtacha oylik miqdori 2015-yilga nisbatan 450 foizga o‘sgan. Yo‘llanmalarning taxminan yarmi zarar yetkazuvchi havolalar bo‘lgan. 2016-yilda yirik ma’lumotlar o‘g‘irlash holatlari soni 13 tadan 15 taga oshgan.

Salomatlik

Yil sayin internet foydalanuvchilarga salomatlik bilan bog‘liq ko‘plab xizmatlarni taklif qilmoqda. “Salomatlik/fitnes” kategoriyasidan yuklab olingan dasturlar soni 1,2 milliardga yetdi.