«Интернет қироличаси» 2017 йилнинг асосий трендларини маълум қилди

Кремний водийсига асосланган Kleiner Perkins Caufield & Byers венчур инвестиция фирмаси навбатдаги йиллик «Интернет тенденция — 2017» ҳисоботини тақдим этди. Ҳисобот бутунжаҳон тармоғида содир бўлаётган воқеаларнинг комплекс кузатуви натижаси ҳисобланади. Ҳисоботни интернет ва янги технологиялар соҳасида бутун дунёда тан олинган эксперт Мэри Микер тайёрлаган. «РБК» ҳисоботдан ўрин олган асосий трендлар рўйхатини тақдим этди.

Интернет глобаллашмоқда

Интернетнинг тарқалиши, аввалгидан секинроқ темпда бўлса ҳам, давом этмоқда. 2016 йилда бутунжаҳон тармоғидан фойдаланувчилар сони 10 фоизга, ёки уч миллиарддан 3,4 миллиардга ўсди. Бу Ер аҳолисининг ярмига яқинини ташкил қилади.

Adblock тизими оммалашмоқда

Интернет-реклама ҳажмининг ошиши билан параллел равишда уни блоклашга хизмат қилувчи Adblock тизимига ҳам талаб ўсмоқда. Бундай мобил дастурлардан фойдаланувчилар сони 2016 йилда 220 млн кишига етган. Шахсий компьютерларда улардан фойдаланувчилар эса 400 миллион кишига яқинлашган.

Интернет яқин орада реклама бўйича ТВни ортда қолдиради

Жаҳон интернет-реклама бозорининг ҳажми ўсишда давом этмоқда ва яқин ярим йил ичида 200 миллиард долларни ташкил қилиб, телевизион реклама бозори ҳажмидан ошиб кетади.

2016 йилда инсоният 14 зеттабайт ёки 14 триллион гигабайт маълумот тўплади. 2020 йилга бориб бу кўрсаткич 47 зеттабайтга етади.

Мобил трафик

Интернет-трафик тизимидаги мобил трафикнинг улуши бутун дунёда ошиб бормоқда.  Бу пойгада Нигерия ва Ҳиндистон етакчи ҳисобланади. Бу мамлакатларда интернет-трафикнинг 80 фоизи мобил қурилмаларга тўғри келади.

Компьютер ўйинлари

Интерактив компьютер ўйинларини ўйновчилар сони 2016 йилда 2,6 миллиардни ташкил қилган. 1995 йилда уларнинг сони 100 миллион бўлган холос. 2016 йилда компьютер ўйинлари ҳажми 100 миллиард долларни ташкил қилган.

Спам ва маълумотларни ўғирлаш

Кузатувчилар маълумотларига кўра, интернетдаги хавф йилдан йилга ошиб бормоқда. 2016 йилга келиб спамларнинг ўртача ойлик миқдори 2015 йилга нисбатан 450 фоизга ўсган. Йўлланмаларнинг тахминан ярми зарар етказувчи ҳаволалар бўлган. 2016 йилда йирик маълумотлар ўғирлаш ҳолатлари сони 13 тадан 15 тага ошган.

Саломатлик

Йил сайин интернет фойдаланувчиларга саломатлик билан боғлиқ кўплаб хизматларни таклиф қилмоқда. «Саломатлик/фитнес» категориясидан юклаб олинган дастурлар сони 1,2 миллиардга етди.