Birlashgan Millatlar Tashkilotining Jenevadagi shtab-kvartirasida bo‘lib o‘tgan AI For Good sammitida qirol Charlz III ning AI-Da robot-gumanoidi tomonidan chizilgan portreti taqdim etildi. Bu haqda Sky News’ga tayanib “Pravila jizni” xabar bermoqda.
Algorithm King deb nomlangan kartina moybo‘yoqda chizilgan bo‘lib, robotning “ko‘zi”ga o‘rnatilgan kameralardan olingan tasvirlar asosida yaratilgan. AI-Da suratni qo‘llari o‘rniga o‘rnatilgan bionik protezlar bilan chizgan.
Tashqi ko‘rinishidan ayolga o‘xshab ketadigan odamsimon robot AI-Da 2019-yilda yaratilgan va 1842-yilda hisoblash mashinasining tavsifini yaratgan hamda ushbu mashina uchun dunyodagi birinchi dasturni tuzgan ingliz matematigi Ada Lavleys sharafiga nomlangan.
Muloqot uchun sun’iy intellekt tilining takomillashtirilgan modelidan foydalanadigan AI-Da roboti ham sammitdagi ishtiroki haqidagi taassurotlari bilan o‘rtoqlashdi: “BMTda, texnologiyalar va madaniyat kelajagini shakllantiruvchilar davrasida ushbu ajoyib tadbirning bir qismi bo‘lish men uchun katta sharaf. Qirol Charlz III ning portretini taqdim etishim shunchaki ijodiy harakat emas, balki sun’iy intellektning jamiyatimizdagi o‘rni o‘zgarayotgani haqidagi bayonot va sun’iy intellekt madaniy landshaftni qanday shakllantirayotgani borasida mulohaza yuritishdir”.
O‘z navbatida, Jahon savdo tashkiloti va BMTning Jenevadagi doimiy vakili, elchi Saymon Menli “AI-Da shunchaki texnologik mo‘jiza emas, balki madaniy muloqot mavzusidir”, dedi. U, shuningdek, Britaniya innovatsiyalaridan hayratda ekanligini va yangi texnologiyalar san’at, axloq va o‘ziga xoslik bo‘yicha global muloqotga ta’sir ko‘rsatishiga umid bildirdi.
Izoh (0)