Sind viloyatida joylashgan hayvonlar boshpanasida tuyaga AQSHda tayyorlangan maxsus protez o‘rnatildi. Bu Pokiston tarixida yirik hayvonga birinchi marta protez qo‘yilishi bo‘ldi.
2024-yil iyun oyida Kemmi laqabli tuyaning oyog‘i mahalliy yer egalaridan biri tomonidan kesib tashlandi. Tuya uning dalasiga kirib ketgani uchun erkak shu tariqa jonivorni “jazolagan”.
Voqea videolari ijtimoiy tarmoqlarda tarqalib, jamoatchilik noroziligiga sabab bo‘ldi. Shundan so‘ng rasmiylar ushbu holatga e’tibor qaratib, tuyani zudlik bilan Karachidagi CDRS (Comprehensive Disaster Response Services) boshpanasiga olib bordi.
U yerdagi shifokorlar va xodimlar so‘zlariga ko‘ra, tuya og‘riq va ruhiy zarba sabab aynan erkaklardan qattiq qo‘rqib qolgan edi. Boshpana rahbari Shima Xonning aytishicha, “Kemmi chinqirib yig‘lar, biz uning yurakni ezadigan nolalariga guvoh bo‘lar edik”.
Tuyani ruhiy jihatdan tiklash jarayoni murakkab kechdi. Mutaxassislar uni boshqa urg‘ochi tuya — Kelli bilan tanishtirishdi, natijada tuya Kemmi ilk bor uch oyog‘ida turishga urinib ko‘rdi va ancha tinchlandi.
Dastlabki davolanish bosqichlaridan so‘ng Kemmi uchun AQSHda ishlab chiqarilgan individual protezga buyurtma berildi. Protez o‘rnatilgach, Kemmi ilk qadamlarini tashladi. Veterinar Babar Husaynning so‘zlariga ko‘ra, tuya hali to‘liq moslashmagan, ammo har kunlik 15–20 daqiqalik mashg‘ulotlar orqali asta-sekin protezga ko‘nikib bormoqda. To‘liq moslashuv jarayoni taxminan 2–3 hafta davom etadi.
Pokistonda bu yirik hayvonga qo‘yilgan ilk protez bo‘lib, mazkur tajriba mamlakat veterinariya va hayvonlarni himoya qilish sohasi uchun muhim qadam hisoblanadi.
Hozircha Kemmi Karachidagi boshpanada qolgan va hayoti davomida shu yerda yashashi rejalashtirilgan. Unga doimiy tibbiy parvarish, ijtimoiy moslashuv va jismoniy reabilitatsiya xizmatlari ko‘rsatiladi.
Mutaxassislar bu holat hayvonlarga nisbatan zo‘ravonlikka qarshi kurashda, shuningdek, nogiron hayvonlarga yordam berish bo‘yicha ijobiy o‘zgarishlar uchun turtki bo‘lishiga umid qilishmoqda.
Izoh (0)