Yaponiya bosh vaziri va Liberal-demokratik partiya (LDP) rahbari Shigeru Isiba saylovdagi mag‘lubiyat tufayli oy oxirigacha iste’foga chiqishni rejalashtirmoqda. Bu haqda uning yaqinlariga tayanib, Yomiuri gazetasi xabar berdi.
20-iyul kuni Yaponiyaning hukmron koalitsiya — (LDP) va uning sherigi “Komeito” — parlamentning yuqori palatasi (maslahatchilar palatasi)da ko‘pchilik o‘rinni yo‘qotgan. Ular 47 ta (tegishlicha 39 va 8 ta) mandatni qo‘lga kiritgan. Natijada 125 o‘rindan iborat palatada ko‘pchilik uchun zarur bo‘lgan 50 ta o‘ringa erisha olmagan.
Partiya 1955-yilda tashkil topganidan buyon, 1993-1996 va 2009-2012-yillarni hisobga olmaganda, mamlakatni deyarli uzluksiz boshqarib kelgan.
Saylovlardagi mag‘lubiyatdan so‘ng partiya ichida Isibaning iste’fosi bo‘yicha chaqiriqlar yangragan. 22-iyul kuni partiya rahbariyatiga muddatidan oldin saylov o‘tkazish uchun imzo to‘plash harakati boshlandi. Bosh vazirning o‘zi Yaponiya-AQSH o‘rtasidagi tarif muzokaralari yakunlangach, iste’foga chiqishini aytgan.
Yaponiya va AQSHning savdo muzokarlari
AQSH prezidenti Donald Tramp Yaponiyaga 25 foizlik bojxona to‘lovlari bilan tahdid qilgan edi. Bu to‘lovlar 1-avgustdan kuchga kirishi kerak. Bu aprel oyida AQSH o‘nlab mamlakatlardan keladigan tovarlarga tariflarni oshirish va’dasining bir qismi hisoblanadi.
Vashington shu orqali savdo hamkorlaridan yon berishni talab qilmoqda. Bir necha oylik muzokaralar natijasida Tokio va Vashington murosaga kelishga erishgan. 23-iyul kuni Tramp AQSH va Yaponiya bojxona to‘lovlari masalasini hal qilish uchun savdo bitimi tuzganini aytgan. Siyosatchi uni “tarixdagi eng yirik bitim” deb atagan. Bitim Yaponiyaning AQSHga 550 milliard dollar miqdorida sarmoya kiritishini, Amerika tovarlari uchun Yaponiya bozorini ochishni va AQSH tovarlariga 15 foizlik tariflar belgilashni o‘z ichiga oladi.
Yaponiya AQSHning eng yirik import manbalaridan biri sanaladi. U 2024-yilda faqat Meksika, Kanada, Xitoy va Germaniyaga yutqazgan. Bir necha oy davomida Yaponiya va AQSH savdo kelishuviga erishish uchun kurashgan, kelishuvni, shu jumladan yaqinlashib kelayotgan saylovlarni to‘xtatib qo‘ygandi.
Izoh (0)