2-iyun, juma kuni Gvineya, Kot-d’Ivuar, Kuvayt, Peru va Polsha BMT Xavfsizlik kengashining 2018—2019-yillardagi a’zolari etib saylandi. Bu haqda ovozlar hisob-kitob qilingandan so‘ng BMT Bosh assambleyasi sessiyasi raisi Piter Tomson ma’lum qildi, deb xabar berdi “TASS”.
Ovoz berish vaqtida ushbu beshta davlat BMTga a’zo davlatlarning uchdan ikki qismining ovozini oldi. Kot-d’Ivuarga 189 ta delegatsiya, Kuvaytga 188 ta, Gvineyaga 185 ta, Polshaga 190 ta va Peruga 186 ta delegatsiya ovoz berdi.
2018-yil 1-yanvaridan ushbu davlatlar BMT Xavfsizlik kengashi tarkibiga 2016-yilda a’zo bo‘lgan Misr, Senegal, Yaponiya, Urugvay va Ukraina o‘rnini egallaydi. 2018-yil oxirigacha Boliviya, Qozog‘iston, Shvetsiya va Efiopiya Xavfsizlik kengashining a’zolari sifatida qoladi.
Bundan tashqari, Niderlandiya 2018-yilda Xavfsizlik kengashida hozirda Italiya egallab turgan o‘ringa o‘tadi, chunki o‘tgan yilgi ovoz berishda Rim Xavfsizlik kengashidagi ikki yillik a’zolikni Amsterdam bilan bo‘lishishga rozi bo‘lgan. Bunday qaror ikki davlat o‘rtasida bir necha raundlardan keyin ham g‘olibni aniqlashning iloji bo‘lmagandan so‘ng qabul qilingan.
BMT Xavfsizlik kengashining amaliyotida bu kabi vaziyat oldin ham bo‘lgan. Liberiya va Irlandiya 1961—1962-yillarda navbat bilan bir yillik a’zolikni o‘tashgan. Ruminiya va Filippin 1962—1963-yillarda ikki yillik vakolatni bo‘lishgan, 1964—1965-yillarda esa Xavfsizlik kengashida Chexoslovakiya o‘rnini Malayziya egallagan edi.
Izoh (0)