2 июнь, жума куни Гвинея, Кот-д’Ивуар, Кувайт, Перу ва Польша БМТ Хавфсизлик кенгашининг 2018—2019 йиллардаги аъзолари этиб сайланди. Бу ҳақда овозлар ҳисоб-китоб қилингандан сўнг БМТ Бош ассамблеяси сессияси раиси Питер Томсон маълум қилди, деб хабар берди «ТАСС».
Овоз бериш вақтида ушбу бешта давлат БМТга аъзо давлатларнинг учдан икки қисмининг овозини олди. Кот-д’Ивуарга 189 та делегация, Кувайтга 188 та, Гвинеяга 185 та, Польшага 190 та ва Перуга 186 та делегация овоз берди.
2018 йил 1 январидан ушбу давлатлар БМТ Хавфсизлик кенгаши таркибига 2016 йилда аъзо бўлган Миср, Сенегал, Япония, Уругвай ва Украина ўрнини эгаллайди. 2018 йил охиригача Боливия, Қозоғистон, Швеция ва Эфиопия Хавфсизлик кенгашининг аъзолари сифатида қолади.
Бундан ташқари, Нидерландия 2018 йилда Хавфсизлик кенгашида ҳозирда Италия эгаллаб турган ўринга ўтади, чунки ўтган йилги овоз беришда Рим Хавфсизлик кенгашидаги икки йиллик аъзоликни Амстердам билан бўлишишга рози бўлган. Бундай қарор икки давлат ўртасида бир неча раундлардан кейин ҳам ғолибни аниқлашнинг иложи бўлмагандан сўнг қабул қилинган.
БМТ Хавфсизлик кенгашининг амалиётида бу каби вазият олдин ҳам бўлган. Либерия ва Ирландия 1961—1962 йилларда навбат билан бир йиллик аъзоликни ўташган. Руминия ва Филиппин 1962—1963 йилларда икки йиллик ваколатни бўлишган, 1964—1965 йилларда эса Хавфсизлик кенгашида Чехословакия ўрнини Малайзия эгаллаган эди.
Изоҳ (0)