Moskvaning Lyublino tumani sudi sudyasi Marina Vasina milliarder Alisher Usmonovning rossiyalik muxolifatchi Aleksey Navalniyga nisbatan da’vosini qo‘llab-quvvatladi. Meduza’ning yozishicha, sud “U sizga Dimon emas” film-surishtiruvini YouTube’dan o‘chirish va Usmonovning sha’niga tahqirlovchi ma’lumotlar yuzasidan raddiya berish haqida qaror chiqargan.
Bundan tashqari, sud qaroriga asosan, “U sizga Dimon emas” filmi joylashtirilgan sayt ham o‘chirib tashlanishi kerak (unda atigi bitta bob Alisher Usmonovga bag‘ishlangan). Filmda Usmonov Rublyovkadagi dang‘illama uy-joyni Rossiya bosh vaziri Dmitriy Medvedevning kursdoshlari tomonidan nazorat qilingan fondga sovg‘a qilgani haqida so‘z boradi.
Bundan tashqari, Navalniy o‘z blogidan Alisher Usmonov Rossiya bosh vaziri o‘rinbosari Igor Shuvalovga pora bergani haqidagi, shuningdek, Usmonov “Kommersant” nashriyotida senzura joriy qilgani haqida ayblov yozilgan postlarni o‘chirib tashlashi kerak.
Navalniy “sudning bu qaroriga, Alisher Burhonovichning ta’biri bilan aytganda, tupurishi”ni ma’lum qildi. U sud qarori ustidan shikoyat qilishga va’da berdi.
Sud ishi davomida sudya Vasina guvohlarni chaqirish va “Rosreyestr”ga ma’lumotlarni taqdim etishni so‘rab so‘rov yuborishdan bosh tortdi. Navalniy sudga Rossiya bosh vaziri Dmitriy Medvedevni guvoh sifatida chaqirishni so‘ragan edi.
Sudda Alisher Usmonovning o‘zi ishtirok etmadi, uning manfaatlarini Genrix Padva boshchiligidagi advokatlar guruhi himoya qildi.
Izoh (0)