Москванинг Люблино тумани суди судьяси Марина Васина миллиардер Алишер Усмоновнинг россиялик мухолифатчи Алексей Навальнийга нисбатан даъвосини қўллаб-қувватлади. Meduza’нинг ёзишича, суд «У сизга Димон эмас» фильм-суриштирувини YouTube’дан ўчириш ва Усмоновнинг шаънига таҳқирловчи маълумотлар юзасидан раддия бериш ҳақида қарор чиқарган.
Бундан ташқари, суд қарорига асосан, «У сизга Димон эмас» фильми жойлаштирилган сайт ҳам ўчириб ташланиши керак (унда атиги битта боб Алишер Усмоновга бағишланган). Фильмда Усмонов Рублёвкадаги данғиллама уй-жойни Россия бош вазири Дмитрий Медведевнинг курсдошлари томонидан назорат қилинган фондга совға қилгани ҳақида сўз боради.
Бундан ташқари, Навальний ўз блогидан Алишер Усмонов Россия бош вазири ўринбосари Игорь Шуваловга пора бергани ҳақидаги, шунингдек, Усмонов «Коммерсантъ» нашриётида цензура жорий қилгани ҳақида айблов ёзилган постларни ўчириб ташлаши керак.
Навальний «суднинг бу қарорига, Алишер Бурҳоновичнинг таъбири билан айтганда, тупуриши»ни маълум қилди. У суд қарори устидан шикоят қилишга ваъда берди.
Суд иши давомида судья Васина гувоҳларни чақириш ва «Росреестр»га маълумотларни тақдим этишни сўраб сўров юборишдан бош тортди. Навальний судга Россия бош вазири Дмитрий Медведевни гувоҳ сифатида чақиришни сўраган эди.
Судда Алишер Усмоновнинг ўзи иштирок этмади, унинг манфаатларини Генрих Падва бошчилигидаги адвокатлар гуруҳи ҳимоя қилди.
Изоҳ (0)