O‘zbekiston Prezidentining 19-maydagi “2017–2019-yillarda Buxoro va Buxoro viloyati turistik salohiyatini tezlashtirilgan sur’atlarda rivojlantirish chora-tadbirlari to‘g‘risida”gi qarori bilan shu nomdagi davlat dasturi tasdiqlandi. Bu haqda UzDaily xabar bermoqda.
Loyiha doirasida Buxoro shahrida va viloyatida yangi mehmonxonalar, madaniy va savdo-ko‘ngilochar markazlari, shuningdek, turistik infrastrukturaning boshqa obyektlari quriladi.
Bundan tashqari, restoran yemakxonalar tizimini takomillashtirish hamda turistlarning kechki hordig‘i uchun sharoit yaratish bo‘yicha choralar ko‘riladi. Yangi zamonaviy restoranlar qurilishi, o‘zbek milliy musiqasining teatrlashtirilgan konsert dasturlari tayyorlanishi va namoyish etilishi, milliy urf-odat va an’analar namoyishlari uyushtirilishi ko‘zda tutilmoqda.
Dastur transport xizmatlarini yaxshilash, aviatsiya va temir yo‘l infrastrukturasini aviareyslar va “Afrosiyob” elektr poyezdi reyslari sonini oshirishi yo‘li bilan rivojlantirish bo‘yicha choralarni nazarda tutadi.
Buxoro shahri hududini obodonlashtirish, turistik infrastruktura obyektlari hududida bankomat va terminallar o‘rnatilishi, valyuta ayirboshlash punktlarining, Wi-Fi zonalarining tashkil etilishi ko‘zda tutilmoqda.
Shuningdek, yangi turistik yo‘nalishlar tashkil etiladi, turizmning yangi turlari rivojlantiriladi. Xususan, Shofirkon tumanidagi “Ag‘utma” ko‘li atrofida turistik infrastrukturani rivojlantirish, “Jayron” ekologik markazini kapital ta’mirdan o‘tkazish hamda uning atrofida zoologiya bog‘ini qurish rejalashtirilmoqda.
Izoh (0)