Ўзбекистон Президентининг 19 майдаги «2017–2019 йилларда Бухоро ва Бухоро вилояти туристик салоҳиятини тезлаштирилган суръатларда ривожлантириш чора-тадбирлари тўғрисида»ги қарори билан шу номдаги давлат дастури тасдиқланди. Бу ҳақда UzDaily хабар бермоқда.
Лойиҳа доирасида Бухоро шаҳрида ва вилоятида янги меҳмонхоналар, маданий ва савдо-кўнгилочар марказлари, шунингдек, туристик инфраструктуранинг бошқа объектлари қурилади.
Бундан ташқари, ресторан емакхоналар тизимини такомиллаштириш ҳамда туристларнинг кечки ҳордиғи учун шароит яратиш бўйича чоралар кўрилади. Янги замонавий ресторанлар қурилиши, ўзбек миллий мусиқасининг театрлаштирилган концерт дастурлари тайёрланиши ва намойиш этилиши, миллий урф-одат ва анъаналар намойишлари уюштирилиши кўзда тутилмоқда.
Дастур транспорт хизматларини яхшилаш, авиация ва темир йўл инфраструктурасини авиарейслар ва «Афросиёб» электр поезди рейслари сонини ошириши йўли билан ривожлантириш бўйича чораларни назарда тутади.
Бухоро шаҳри ҳудудини ободонлаштириш, туристик инфраструктура объектлари ҳудудида банкомат ва терминаллар ўрнатилиши, валюта айирбошлаш пунктларининг, Wi-Fi зоналарининг ташкил этилиши кўзда тутилмоқда.
Шунингдек, янги туристик йўналишлар ташкил этилади, туризмнинг янги турлари ривожлантирилади. Хусусан, Шофиркон туманидаги «Ағутма» кўли атрофида туристик инфраструктурани ривожлантириш, «Жайрон» экологик марказини капитал таъмирдан ўтказиш ҳамда унинг атрофида зоология боғини қуриш режалаштирилмоқда.
Изоҳ (0)