Vazirlar Mahkamasi davlat mulki obyektlarini sotishni xalqaro amaliyotda keng tarqalgan shakllarini joriy etish hamda aholi keng qatlamlarini fond bozoriga jalb qilish maqsadida “Fond birjasida aksiyalarni ommaviy taklifini o‘tkazishni tashkil etish to‘g‘risida” qaror qabul qildi. Bu haqda Davlat raqobat qo‘mitasi axborot hizmati ma’lum qildi.
Mazkur qaror O‘zbekiston Respublikasi Prezidentining “Tadbirkorlik maqsadlarida foydalanish uchun davlat mulki obyektlarini sotishni jadallashtirish va uning tartib-taomillarini yanada soddalashtirish chora-tadbirlari to‘g‘risida”gi Farmoni talablariga muvofiq qabul qilindi.
Qaror bilan birlamchi (IPO) va ikkilamchi (SPO) ommaviy taklif etiladigan aksiyadorlik jamiyatlari ro‘yxati tasdiqlandi. Ushbu ro‘yxatga “Kvars” AJ, “Shahrisabz vino-aroq” AJ va “Qo‘qon mexanika zavodi” AJ kirdi.
Yuqorida qayd qilingan aksiyalarni ommaviy taklifini taklif qiluvchilar sifatida (anderrayterlar) Milliy bank va “Asaka” banki chiqmoqda, ularning sotuvga qo‘yilgan aksiyalar paketi ustav kapitalining 10 foizini tashkil etadi.
Davlat raqobat qo‘mitasi “Shahrisabz vino-aroq” AJ aksiyalarini taklif qiluvchi sifatida chiqmoqda.
Qarorda bitta shaxs tomonidan (anderrayterdan tashqari) sotib olinadigan aksiyalarning soni aksiyadorlik jamiyati aksiyalarining umumiy sonining 0,05 foizidan oshmasligi kerakligi belgilangan.
Aksiyalarni fond bozorida birlamchi (IPO) va ikkilamchi (SPO) oshkora taklif etish orqali realizatsiya qilish taklifni eng yuqori narxini hisobga olgan holda investor tomonidan taklif qilingan narxlarda amalga oshiriladi.
Izoh (0)