Вазирлар Маҳкамаси давлат мулки объектларини сотишни халқаро амалиётда кенг тарқалган шаклларини жорий этиш ҳамда аҳоли кенг қатламларини фонд бозорига жалб қилиш мақсадида «Фонд биржасида акцияларни оммавий таклифини ўтказишни ташкил этиш тўғрисида» қарор қабул қилди. Бу ҳақда Давлат рақобат қўмитаси ахборот ҳизмати маълум қилди.
Мазкур қарор Ўзбекистон Республикаси Президентининг «Тадбиркорлик мақсадларида фойдаланиш учун давлат мулки объектларини сотишни жадаллаштириш ва унинг тартиб-таомилларини янада соддалаштириш чора-тадбирлари тўғрисида»ги Фармони талабларига мувофиқ қабул қилинди.
Қарор билан бирламчи (IPO) ва иккиламчи (SPO) оммавий таклиф этиладиган акциядорлик жамиятлари рўйхати тасдиқланди. Ушбу рўйхатга «Кварц» АЖ, «Шаҳрисабз вино-ароқ» АЖ ва «Қўқон механика заводи» АЖ кирди.
Юқорида қайд қилинган акцияларни оммавий таклифини таклиф қилувчилар сифатида (андеррайтерлар) Миллий банк ва «Асака» банки чиқмоқда, уларнинг сотувга қўйилган акциялар пакети устав капиталининг 10 фоизини ташкил этади.
Давлат рақобат қўмитаси «Шаҳрисабз вино-ароқ» АЖ акцияларини таклиф қилувчи сифатида чиқмоқда.
Қарорда битта шахс томонидан (андеррайтердан ташқари) сотиб олинадиган акцияларнинг сони акциядорлик жамияти акцияларининг умумий сонининг 0,05 фоизидан ошмаслиги кераклиги белгиланган.
Акцияларни фонд бозорида бирламчи (IPO) ва иккиламчи (SPO) ошкора таклиф этиш орқали реализация қилиш таклифни энг юқори нархини ҳисобга олган ҳолда инвестор томонидан таклиф қилинган нархларда амалга оширилади.
Изоҳ (0)