Alisher Usmonovning matbuot xizmati Korrupsiyaga qarshi kurashish fondi asoschisi va muxolifatchi Aleksey Navalniyning videomurojaatiga izoh berib, uni “uch karra yolg‘on”da aybladi, deb xabar berdi “RBK”.
Matbuot xizmatining eslatishicha, Usmonov o‘zining ikkinchi videomurojaatida Navalniy milliarderni zo‘rlash bo‘yicha qamoqda jazo o‘tadi deya “aniq yolg‘on” so‘zlaganini misol qilib keltirgan. Usmonovning vakillari “zo‘rlash” so‘zi Turkiston okrugining harbiy tribunalining 1980-yil 19-avgustdagi hukmida ham, O‘zbekiston Respublikasi Oliy sudi harbiy hay’atining 2000-yil 3-maydagi ajrimida ham mavjud emasligini qo‘shimcha qildi.
Usmonov iqtisodiy ayblovlar — firibgarlik va pora olish jinoyati bo‘yicha sakkiz yilga mahkum qilingan (shundan olti yilini qamoqda o‘tagan), biroq sud hujjatlarida zo‘rlash haqida gap ketmagan. 2000-yilda Usmonovning sudlanganligi bekor qilingan edi.
Usmonov vakillari Navalniy zo‘rlash haqidagi ma’lumotni Buyuk Britaniyaning O‘zbekistondagi sobiq elchisi Kreyg Myurreyning kitobidan topganiga e’tibor qaratdi.
“Nomi keltirilgan kitobda bu kabi ma’lumotlar mavjud emas, istalgan odam uni tekshirib ko‘rishi mumkin. Shunday ekan janob Navalniy uch karra yolg‘on so‘zladi: birinchidan, Alisher Usmonov hech qachon zo‘rlash ayblovi bilan sudlanmagan, ikkinchidan, Navalniy o‘zi gapirgan kitobni o‘qib ham ko‘rmagan, uchinchidan — kitobda bu haqida birorta so‘z ham yo‘q”, — deb murojaatiga yakun yasadi milliarderning matbuot xizmati.
Izoh (0)