Алишер Усмоновнинг матбуот хизмати Коррупцияга қарши курашиш фонди асосчиси ва мухолифатчи Алексей Навальнийнинг видеомурожаатига изоҳ бериб, уни «уч карра ёлғон»да айблади, деб хабар берди «РБК».
Матбуот хизматининг эслатишича, Усмонов ўзининг иккинчи видеомурожаатида Навальний миллиардерни зўрлаш бўйича қамоқда жазо ўтади дея «аниқ ёлғон» сўзлаганини мисол қилиб келтирган. Усмоновнинг вакиллари «зўрлаш» сўзи Туркистон округи ҳарбий трибуналининг 1980 йил 19 августдаги ҳукмида ҳам, Ўзбекистон Республикаси Олий суди ҳарбий ҳайъатининг 2000 йил 3 майдаги ажримида ҳам мавжуд эмаслигини қўшимча қилди.
Усмонов иқтисодий айбловлар — фирибгарлик ва пора олиш жинояти бўйича саккиз йилга маҳкум қилинган (шундан олти йилини қамоқда ўтаган), бироқ суд ҳужжатларида зўрлаш ҳақида гап кетмаган. 2000 йилда Усмоновнинг судланганлиги бекор қилинган эди.
Усмонов вакиллари Навальний зўрлаш ҳақидаги маълумотни Буюк Британиянинг Ўзбекистондаги собиқ элчиси Крейг Мюррейнинг китобидан топганига эътибор қаратди.
«Номи келтирилган китобда бу каби маълумотлар мавжуд эмас, исталган одам уни текшириб кўриши мумкин. Шундай экан жаноб Навальний уч карра ёлғон сўзлади: биринчидан, Алишер Усмонов ҳеч қачон зўрлаш айблови билан судланмаган, иккинчидан, Навальний ўзи гапирган китобни ўқиб ҳам кўрмаган, учинчидан — китобда бу ҳақида бирорта ҳам сўз йўқ», — деб мурожаатига якун ясади миллиардернинг матбуот хизмати.
Изоҳ (0)