Kolumbiyadagi BMT missiyasining ma’lum qilishicha, “Kolumbiya inqilobiy qurolli kuchlari” guruhining 12 nafar jangchidan iborat birinchi guruhi BMT tomonidan yakka tartibda qurolsizlanish sertifikatini olib, rasmiy ravishda qurol topshirish jarayonini yakunladi, deb xabar berdi “Kommersant”.
BMTning qayd etishicha, sobiq qo‘zg‘olonchilarga “fuqarolik hayotiga qaytish” imkonini beruvchi hujjatlar topshirilgan. Shuningdek, mintaqaga topshirilgan qurollarni saqlash maqsadida maxsus 41 ta konteyner va 52 ta quti olib kelingan.
Qurolsizlantirish jarayoni BMTning 450 nafar kuzatuvchisi nazoratida 1-mart kuni boshlangan bo‘lib, 29-mayda yakunlanishi kerak. Fevral oyida Kolumbiyada yirik qo‘zg‘olonchilar guruhi va mamlakat hukumati o‘rtasida tinchlik bitimining hal qiluvchi bosqichi — jangarilarni BMT nazoratidagi lagerlarga taqsimlash jarayoni boshlagan edi.
Izoh (0)