Forbes Kazakhstan jurnali mamlakatning 50 nafar eng badavlat biznesmeni reytingini e’lon qildi.
Ro‘yxatni rangli va qimmatbaho metallar qazib olish hamda qayta ishlash bilan shug‘ullanadigan KAZ Minerals guruhi prezidenti Vladimir Kim egalladi. 2016-yil aprelidan beri Kim mol-mulkini 800 million dollarga ko‘paytirib, 2,5 milliard dollarga yetkazdi.
Reytingdagi ikkinchi o‘rinda 2,4 milliard dollar bilan Qozog‘iston tennis federatsiyasi raisi, yirik investor (ForteBank, Beeline Qozog‘iston, Sky Mobile) Bulat Utemuratov qayd etildi.
Ro‘yxatning uchinchi va to‘rtinchi o‘rinlarini prezident Nursulton Nazarboyevning kuyovi, Kazenergy assotsiatsiyasi raisi Timur Kulibayev va uning turmush o‘rtog‘i, davlat rahbarining o‘rtancha qizi Dinara Kulibayeva band etdi. Ular o‘tgan yili daromadlarini 100 million dollarga oshirdi va endilikda har biri 2,2 milliard dollarga egalik qilmoqda.
Qozog‘istonning 50 nafar eng badavlat biznesmeniga tegishli jami mol-mulk 22,3 milliard dollarga yetdi. Bu Qozog‘iston yalpi ichki mahsulotining 16 foizdan oshig‘ini tashkil etadi.
Izoh (0)