“Al-Qoida” terrorchilik guruhi yetakchisi Usama bin Ladenni aynan u o‘ldirganini ma’lum qilgan Amerika maxsus topshiriqli bo‘linmalari jangchisi memuarlar kitobini chiqardi, unda “birinchi raqamli terrorchi” umrining so‘nggi lahzalari haqida gapirib berdi, deb yozadi “RIA Novosti”.
41 yoshli harbiy Robert O’Nill muallifligidagi The Operator (“Mexanik”) kitobi shu hafta nashrdan chiqdi. Unda muallif 2011-yilning o‘sha tunida sodir bo‘lgan hodisalarni batafsil yoritib berdi. Kitobda aytilishicha, maxsus topshiriqli bo‘linma Pokistonning Abbotobod shahrida bin Ladenning boshpanasidagi so‘nggi mudofaa chizig‘ini yorib o‘tgach, O’Nill jangari bilan yuzma-yuz to‘qnashgan.
Razvedka ma’lumotlariga ko‘ra, maxsus topshiriqli bo‘linma bin Ladenning o‘g‘li Xolidni topishi kerak bo‘lgan, u “otasining so‘nggi himoya chizig‘i” bo‘lgan. 23 yoshli Xolid otib tashlangach, harbiy xizmatchilar boshqa xonalarni ko‘zdan kechirishga shoshilgan.
Oxir-oqibat O’Nill terrorchini ko‘rgan, u “o‘zi kutganidan ko‘ra balandroq bo‘yli va ozg‘inroq bo‘lib chiqqan, soqoli tasavvur qilganidan ko‘ra kaltaroq, sochlari oqroq bo‘lgan”. Harbiy ikki marta o‘q uzgan. “Bin Ladenning boshi yorildi va u yerga quladi”, — deya kitob muallifi voqealarni tavsiflaydi.
Harbiy xizmatchining Scribner nashriyoti orqali chop etilgan bayonotida aytilishicha, u janglarning “insoniy tomoni”ni ko‘rsatmoqchi bo‘lgan.
Izoh (0)