Америка махсус топшириқли бўлинмалари жангчиси бин Ладенни қандай ўлдиргани ҳақида китоб ёзди

«Ал-Қоида» террорчилик гуруҳи етакчиси Усама бин Ладенни айнан у ўлдирганини маълум қилган Америка махсус топшириқли бўлинмалари жангчиси мемуарлар китобини чиқарди, унда «биринчи рақамли террорчи» умрининг сўнгги лаҳзалари ҳақида гапириб берди, деб ёзади «РИА Новости».

41 ёшли ҳарбий Роберт O’Нилл муаллифлигидаги The Operator («Механик») китоби шу ҳафта нашрдан чиқди. Унда муаллиф 2011 йилнинг ўша тунида содир бўлган ҳодисаларни батафсил ёритиб берди. Китобда айтилишича, махсус топшириқли бўлинма Покистоннинг Абботобод шаҳрида бин Ладеннинг бошпанасидаги сўнгги мудофаа чизиғини ёриб ўтгач, O’Нилл жангари билан юзма-юз тўқнашган.

Разведка маълумотларига кўра, махсус топшириқли бўлинма бин Ладеннинг ўғли Холидни топиши керак бўлган, у «отасининг сўнгги ҳимоя чизиғи» бўлган. 23 ёшли Холид отиб ташлангач, ҳарбий хизматчилар бошқа хоналарни кўздан кечиришга шошилган.

Охир-оқибат O’Нилл террорчини кўрган, у «ўзи кутганидан кўра баландроқ бўйли ва озғинроқ бўлиб чиққан, соқоли тасаввур қилганидан кўра калтароқ, сочлари оқроқ бўлган». Ҳарбий икки марта ўқ узган. «Бин Ладеннинг боши ёрилди ва у ерга қулади», — дея китоб муаллифи воқеаларни тавсифлайди.

Ҳарбий хизматчининг Scribner нашриёти орқали чоп этилган баёнотида айтилишича, у жангларнинг «инсоний томони»ни кўрсатмоқчи бўлган.