AQSh Xan-Sheyxunda zarin zaharli moddasi ishtirokida amalga oshirilgan kimyoviy hujumga javoban, Suriyadagi ilmiy-tadqiqot markazining 271 nafar xodimiga nisbatan sanksiyalar kiritdi, deya xabar bermoqda “RBK”.
“Suriya hukumati ilmiy markazi konvensional bo‘lmagan qurolni ishlab chiqish va ishlab chiqarish hamda uni yetkazib berish usuli uchun javobgardir”, — deyiladi sanksiyalar kiritilishi sabablari keltirilgan xabarda.
Moliya vazirligi ma’lum qilishicha, sanksiyalarga uchragan suriyalik olimlar kimyo va shunga bog‘liq sohalar mutaxassislari bo‘lib, ularning ba’zilari ilmiy markazning “kimyoviy qurol” yaratish bo‘yicha dasturida kamida 2012-yildan buyon ishlagan.
Sanksiyalar suriyalik olimlarning AQShda Amerika fuqarolari egaligi ostida bo‘lgan yoki ular tomonidan nazorat qilinadigan har qanday xususiy mulkini “muzlatib qo‘yadi”. Shuningdek, moliya vazirligi kiritgan choralar AQSh fuqarolariga sanksiyaga uchragan suriyaliklar bilan moliyaviy aloqalar o‘rnatishni taqiqlaydi.
Izoh (0)