АҚШ Хан-Шейхунда зарин заҳарли моддаси иштирокида амалга оширилган кимёвий ҳужумга жавобан, Суриядаги илмий-тадқиқот марказининг 271 нафар ходимига нисбатан санкциялар киритди, дея хабар бермоқда «РБК».
«Сурия ҳукумати илмий маркази конвенсионал бўлмаган қуролни ишлаб чиқиш ва ишлаб чиқариш ҳамда уни етказиб бериш усули учун жавобгардир», — дейилади санкциялар киритилиши сабаблари келтирилган хабарда.
Молия вазирлиги маълум қилишича, санкцияларга учраган суриялик олимлар кимё ва шунга боғлиқ соҳалар мутахассислари бўлиб, уларнинг баъзилари илмий марказнинг «кимёвий қурол» яратиш бўйича дастурида камида 2012 йилдан буён ишлаган.
Санкциялар суриялик олимларнинг АҚШда Америка фуқаролари эгалиги остида бўлган ёки улар томонидан назорат қилинадиган ҳар қандай хусусий мулкини «музлатиб қўяди». Шунингдек, молия вазирлиги киритган чоралар АҚШ фуқароларига санкцияга учраган сурияликлар билан молиявий алоқалар ўрнатишни тақиқлайди.
Изоҳ (0)