Associated Press agentligi so‘nggi 12 yil davomida butun dunyo bo‘yicha BMT tinchlikparvar shaxslari va personali tomonidan amalga oshirilgan majburiy jinsiy aloqalar bilan bog‘liq qariyb 2000 holat qayd etilganini ma’lum qildi. Bu haqda “RBK” xabar bermoqda.
AP agentligi tadqiqoti natijalari BMT missiyalari tinchlikparvarlari va xodimlari 12 yil davomida tizimli ravishda voyaga yetmaganlar va ayollarni ular bilan jinsiy aloqa o‘rnatishga majbur qilganini ko‘rsatdi.
Agentlik ushbu vaqt davomida jinsiy kuch ishlatish qurboni bo‘lgan 300 ayolni so‘roq qilgan va 23 mamlakat tinchlikparvarlari tomonidan amalga oshirilgan nomusga tegish holati bilan bog‘liq 2000 dan ziyod ariza to‘plagan.
Xususan, Shri-Lankadan bo‘lgan 134 tinchlikparvar shaxs Gaitida 2004—2007-yillarda ushbu maqsadda to‘qqiz nafar boladan foydalangan.
BMT hisobotida qayd etilgan tinchlikparvarlardan 114 nafari uyiga yuborilgan, biroq hech biri amalga oshirgan jinoyati uchun jazolanmagan.
AP agentligi voqeaga aniqlik kiritib, aybdorlarni aniqlash va jazolash maqsadida majburiy jinsiy aloqalar qurbonlari va BMTning hozirgi va sobiq mansabdor shaxslari bilan suhbat uyushtirgan. Ushbu surishtiruvlar natijasida nomusga tegish jinoyatini amalga oshirgan tinchlikparvarlar BMT tomonidan jazolana olmasligi, jazo faqatgina ushbu shaxslar istiqomat qiluvchi mamlakatlar hukumati tomonidan berilishi mumkinligi haqida xulosa kelib chiqdi.
Agentlik mazkur jinoyat ijrochilari juda kam holatlardagina aybdor deb topilgani, hatto shunda ham ularning ism-sharifi ma’lum qilinmaganligini qayd etdi. Shu tariqa, ayollarni jinsiy aloqa o‘rnatishga majbur qilganlar javobgarlikdan qochayotgani ta’kidlandi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)