Malyorka sudi Ispaniya qiroli Filipp VI ning opasi malika Kristinani soliq to‘lovlaridan bo‘yin tovlash ishi bo‘yicha aybsiz deb topdi. Bu haqda Meduza xabar bermoqda.
Ayni vaqtda, sud fuqarolik da’vosi bo‘yicha yetkazilgan zararni qoplash uchun malika Kristinaga 265 ming yevro miqdorida jarima to‘lash majburiyatini yukladi.
Malikaning turmush o‘rtog‘i — Inyaki Urdangarin esa sud tomonidan olti yil va uch oyga ozodlikdan mahrum etildi, shuningdek, u shaxsiy boyish maqsadida qirollik oilasi munosabatlaridan foydalangani uchun, 512 ming yevro miqdorida jarima to‘laydi.
Qirolning opasi va uning eri sud majlisida qatnashmagan. Ular so‘nggi bir necha yildan beri Shveysariyada yashab kelmoqda. Oila sud qarori ustidan shikoyat qilish-qilmasligi borasida hech qanday ma’lumot yo‘q.
Malika Kristina Ispaniyada 1975-yili monarxiya qayta tiklanganidan so‘ng qirollik oilasining sudga jalb etilgan ilk vakili bo‘ldi.
Malikaning turmush o‘rtog‘i Inyaki Urdangarin Noos Institute notijorat tashkilotiga rahbarlik qilgan bo‘lib, u sport va sayyohlik tadbirlarini tashkil etish bo‘yicha davlat buyurtmalarini qabul qilgan. Tergov ma’lumotlariga ko‘ra, loyihalarning qiymati keskin oshirib ko‘rsatilgan, Urdangarin esa olgan pullarini ofshorlardagi hisob-raqamlarga chiqargan.
Tergovi 2010-yilda boshlangan Noos ishi xalq orasida qirollik oilasining nufuzi tushishiga va Filipp VI ning otasi — Xuan Karlos I ning qirollik tojidan voz kechishiga sabab bo‘lgan edi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)