Испания маликаси солиқ тўловларидан бўйин товлаш иши бўйича айбсиз деб топилди. Унинг эри 6 йилга озодликдан маҳрум этилди

Мальорка суди Испания қироли Филипп VI нинг опаси малика Кристинани солиқ тўловларидан бўйин товлаш иши бўйича айбсиз деб топди. Бу ҳақда Meduza хабар бермоқда.

Айни вақтда, суд фуқаролик даъвоси бўйича етказилган зарарни қоплаш учун малика Кристинага 265 минг евро миқдорида жарима тўлаш мажбуриятини юклади.

Маликанинг турмуш ўртоғи — Иньяки Урдангарин эса суд томонидан олти йил ва уч ойга озодликдан маҳрум этилди, шунингдек, у шахсий бойиш мақсадида қироллик оиласи муносабатларидан фойдалангани учун, 512 минг евро миқдорида жарима тўлайди.

Қиролнинг опаси ва унинг эри суд мажлисида қатнашмаган. Улар сўнгги бир неча йилдан бери Швейцарияда яшаб келмоқда. Оила суд қарори устидан шикоят қилиш-қилмаслиги борасида ҳеч қандай маълумот йўқ.

Малика Кристина Испанияда 1975 йили монархия қайта тикланганидан сўнг қироллик оиласининг судга жалб этилган илк вакили бўлди.

Маликанинг турмуш ўртоғи Иньяки Урдангарин  Noos Institute нотижорат ташкилотига раҳбарлик қилган бўлиб, у спорт ва сайёҳлик тадбирларини ташкил этиш бўйича давлат буюртмаларини қабул қилган. Тергов маълумотларига кўра, лойиҳаларнинг қиймати кескин ошириб кўрсатилган, Урдангарин эса олган пулларини офшорлардаги ҳисоб-рақамларга чиқарган.

Тергови 2010 йилда бошланган Noos иши халқ орасида қироллик оиласининг нуфузи тушишига ва Филипп VI нинг отаси — Хуан Карлос I нинг қироллик тожидан воз кечишига сабаб бўлган эди.

«Дарё»нинг Telegram’даги расмий канали — @toshqindaryo’га аъзо бўлинг!