“Toshkent-Aero” ixtisoslashtirilgan bojxona kompleksi xodimlari tomonidan huquqni muhofaza qiluvchi boshqa idoralar vakillari bilan hamkorlikda tamaki mahsulotlarining noqonuniy olib o‘tilishiga qarshi chora-tadbirlar muntazam davom ettirilmoqda. Bu haqda “Daryo”ga komleks axborot xizmati ma’lum qildi.
2016- yilda “Toshkent-Aero” ixtisoslashtirilgan bojxona kompleksi xodimlari tomonidan 100 ta bojxona qoidabuzarligi aniqlandi, qiymati 234 million so‘mlik tamaki mahsulotining noqonuniy olib o‘tilishiga chek qo‘yildi. Afsuski, bunday holatlar joriy yilda ham davom etmoqda.
“Toshkent—Istanbul” reysi bo‘yicha bir kunda parvozga otlangan samarqandlik opa-singil Axmatovalar (maqoladagi barcha ism-shariflar o‘zgartirilgan) ularning hamrohlari D.Abdualiyeva va R.Sayfiddinov Turkiyaga “quruq” qo‘l bilan borishni o‘zlariga ep ko‘rishmadi chog‘i, ular jami 1360 quti KENT HD sigaretlarini yo‘lovchi bojxona deklaratsiyasida va bojxona xodimining og‘zaki so‘rovi paytida ma’lum qilmasdan olib chiqishga urinishgan paytda to‘xtatib qolindi. Xorijda pullash uchun ko‘zlangan mazkur tamaki mahsulotlarining umumiy qiymati 7,3 million so‘mni tashkil qilar ekan.
Navbatdagi qonunbuzarlik holatlari ham yuqoridagisiga juda o‘xshash. Yana o‘sha reys, yana o‘sha manzil, yana o‘sha nomdagi tamaki mahsuloti. Bu gal bojxonachilari fuqaro T.Isomovni qing‘ir qilmishi ustida fosh qildi. U bagajiga yashirgan holda qiymati salkam 1,6 million so‘mlik 300 quti sigaretni bojxona nazoratidan chetlab olib chiqishga uringan edi.
Sh.Ibodov esa manzilni ham, mo‘ljalni ham kattarog‘ini tanladi. U okeanortiga mamlakat haqida iliq taassurot qoldiruvchi esdalik buyumlar o‘rniga tamaki mahsulotlarini olib ketishni afzal ko‘rdi. “Toshkent–Nyu York” reysi bo‘yicha parvozi oldidan Sh.Ibodovning bu rejasi chipakka chiqdi. Qiymati 2,8 million so‘mdan ortiq bo‘lgan 570 quti sigaretni yashirin ravishda olib chiqishning oldi olindi.
Hozirda mazkur holatlar yuzasidan bojxona tekshiruvi va surishtiruv harakatlari davom ettirilmoqda.
Kishini taajjubga soladigan jihat shuki, ko‘p miqdordagi tamaki mahsulotlarini ayrim mamlakatlarga olib kirishning o‘zi amalda mumkin emas. Masalan, jismoniy shaxslar tomonidan tovarlarni bojsiz olib kirish me’yorlariga ko‘ra, AQShga faqatgina 10 quti sigaret olib kirishga ruxsat etiladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)