O‘zbekistonda paxta terishda tashkillashtirilgan bolalar mehnati amaliyoti tugatilishiga erishildi. Bu haqda Xalqaro mehnat tashkiloti (XMT) 1-fevralda e’lon qilingan bayonotida ma’lum qildi, deb yozadi “Gazeta.uz”.
“Bolalar mehnatining nomaqbulligi jamiyatning barcha qatlamlari: hukumat, o‘qituvchilar, mutaxassislar, fermerlar, ota-onalar va bolalarning o‘zlari tomonidan tan olinadi. O‘zbekiston tashkillashtirilgan bolalar mehnati amaliyotini tugatdi”, — deyiladi XMTning 2016-yilgi paxta terish kampaniyasi ustidan mustaqil monitoring yakunlari bo‘yicha hisobotida.
Hujjatda qayd etilishicha, 2016-yil sentabr—oktabridagi paxta terish davrida o‘tkazilgan umummilliy axborot kampaniyasi sharofati bilan mamlakat jamoatchiligi mehnat munosabatlarining taqiqlangan amaliyotlari haqida yaxshiroq xabardor bo‘ldi.
XMT O‘zbekistonda bolalar mehnati va majburiy mehnatga qarshi kurashishga yo‘naltirilgan choralar va davlat majburiyatlari amalga oshishi yuzasidan monitoring o‘tkazdi va “Jahon banki tomonidan qo‘llab-quvvatlanayotgan agrar va suv sektorlaridagi, shuningdek, ta’lim sektoridagi loyihalar doirasida bolalar mehnati va majburiy mehnat holatlari aniqlanmaganligi” haqida hisob berdi.
Shu bilan birga, XMT fuqarolarning ba’zi toifalari, shu jumladan, talabalar, ta’lim va sog‘liqni saqlash muassasalari xodimlari va davlat xizmatchilari uchun majburiy mehnat xavflari hamon saqlanib qolayotganini eslatdi.
Izoh (0)