«Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда тамаки маҳсулотларининг ноқонуний олиб ўтилишига қарши чора-тадбирлар мунтазам давом эттирилмоқда. Бу ҳақда «Дарё»га комлекс ахборот хизмати маълум қилди.
2016- йилда «Тошкент-Аэро» ихтисослаштирилган божхона комплекси ходимлари томонидан 100 та божхона қоидабузарлиги аниқланди, қиймати 234 миллион сўмлик тамаки маҳсулотининг ноқонуний олиб ўтилишига чек қўйилди. Афсуски, бундай ҳолатлар жорий йилда ҳам давом этмоқда.
«Тошкент—Истанбул» рейси бўйича бир кунда парвозга отланган самарқандлик опа-сингил Ахматовалар (мақоладаги барча исм-шарифлар ўзгартирилган) уларнинг ҳамроҳлари Д.Абдуалиева ва Р.Сайфиддинов Туркияга «қуруқ» қўл билан боришни ўзларига эп кўришмади чоғи, улар жами 1360 қути КЕНТ HD сигаретларини йўловчи божхона декларациясида ва божхона ходимининг оғзаки сўрови пайтида маълум қилмасдан олиб чиқишга уринишган пайтда тўхтатиб қолинди. Хорижда пуллаш учун кўзланган мазкур тамаки маҳсулотларининг умумий қиймати 7,3 миллион сўмни ташкил қилар экан.
Навбатдаги қонунбузарлик ҳолатлари ҳам юқоридагисига жуда ўхшаш. Яна ўша рейс, яна ўша манзил, яна ўша номдаги тамаки маҳсулоти. Бу гал божхоначилари фуқаро Т.Исомовни қинғир қилмиши устида фош қилди. У багажига яширган ҳолда қиймати салкам 1,6 миллион сўмлик 300 қути сигаретни божхона назоратидан четлаб олиб чиқишга уринган эди.
Ш.Ибодов эса манзилни ҳам, мўлжални ҳам каттароғини танлади. У океанортига мамлакат ҳақида илиқ таассурот қолдирувчи эсдалик буюмлар ўрнига тамаки маҳсулотларини олиб кетишни афзал кўрди. «Тошкент – Нью Йорк» рейси бўйича парвози олдидан Ш.Ибодовнинг бу режаси чипакка чиқди. Қиймати 2,8 миллион сўмдан ортиқ бўлган 570 қути сигаретни яширин равишда олиб чиқишнинг олди олинди.
Ҳозирда мазкур ҳолатлар юзасидан божхона текшируви ва суриштирув ҳаракатлари давом эттирилмоқда.
Кишини таажжубга соладиган жиҳат шуки, кўп миқдордаги тамаки маҳсулотларини айрим мамлакатларга олиб киришнинг ўзи амалда мумкин эмас. Масалан, жисмоний шахслар томонидан товарларни божсиз олиб кириш меъёрларига кўра, АҚШга фақатгина 10 қути сигарет олиб киришга рухсат этилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)